Senin, 4 Mei 2020 Yehezkiel 34:20-31
TO MANGKAMBI’ MANANA’
Gembala Setia

Ia ke dibasai randuk diomai aya’ 1 te Yehezkiel 32, maleso dipokada tu kasengkeanNa Puang Matua lako tomangkambi’na to Israel tu tangma’runduananmo umpana’ta’ passanan tengkona ungkambi’ dombana Puang Matua. Napa’dikkimo tomai domba sia nanaimo unnala saro, naeloranmo tu taunna Puang Matua sisarak-sarak. Iamoto anna Puang Matua kalenamo ungkambi’i tu dombaNa, nadaka’ tomai pa’dena, yatomai pusanna na renden sule, nabimbin tomai bangkena, na pamamatoto’ tomai masakinna, sia mintu’i napasipulung sule anna parakai.

Ia te pa’basan dipamanassa kumua Puang Matua la mendadi To mangra’ta’ la ma’paolai salu lan alla’na taunNa. Puang Matua kalena tu la untundui sia la ullendokan taunna diomai kamasa’garanna bangsa senga’. Ia kalena laumpilei tu to lana sua mendadi pengulu laungkambi’ taunNa belanna naanga’ Puang Matua kumua anna ia tu taunna tou manaman sia marampa’. Diala panganderan tu datu Daud tonna dullui Puang mendadi datunna to Israel kumua lasusi dukamo to tu Puang Matua la ungkambi’i tu taunNa. Iamito anna diallu’ kumua lana patutannang sule tu kadatuan lan alla’na taunna kumua la bu’tu diomai tarukna Daud tu to la mendadi Datunna taun-Na Puang Matua.

Ia tonna mangkamo tu Puang Matua ullendokanni tu taunna diomai katangmarurusanna to ma’pana’ta’ sia diomai kakuasanna bangsa senga’, nasolanmi sule tu taunNa lako katuoan marampa’ anna perasai tu kamarampasan dio mai Puang Matua tu Napamanassa lan kasaeanna to mangkambi’ matontongan. Tomangkambi’ matontonganta iamo tu Puang Matua tu la tontong ungkambi’ki’ keallo sia ke bongi anna soronganki’ passakke dikua anna den tontong manaman lan katuoanta.