Senin, 21 Desember  2020 1 Samuel 1:1-20
NAKILALAI PUANG TU PALAKUNNA TAUNNA
(Tuhan Mengingat Permohonan Umat-Nya)
God Remembers His People’s Request

Tontong siaraka ta kanaasai kumua iatu pangandota Nakilalai sia na pebali puang? Tae’ siaraka anna mukkunmo moro’ penaanta mengkarapa’ sia mengkamoya langan Puang belanna disanga kumua tang nakilalimo sia tang napebalimo Puang tu  papalakunta lan passambayangan?

Pa’basanta unnulelean kamagasan urrampoi misa’ indo’ iamo tu Hana. Manassa mandu mapa’di’ (ay.150), belanna napa’dikki sanglentekna  iamo tu  Penina” (ay.6). Di sa’bu’ dikka’ to tang keangga’ attu iato (saba tae’ nakianak, ay.2; tamanang,ay.6).Pussak duka tu muanena siambe’ ne’ Elkana untiroi, nakuami “apara ussussai penaammu?Ma’apari mu tumangi’ sia tang kumande?” (ay.8). Lan a’gan iate ia tu Hana Situang tangi’ tang maranganna mengkamoya massambayang (ay.12a,16b) umbarrakan issi penaan lako Puang (ay.15b), sia mangallonan lako Puang nakua “IaMi kilalaina’ O,Puang, Mibenna’ bati’, anna pia iato la kosorong lako kaleMi sia tae’ na la urrumbui peku’ku’ tu ulunna”(ay.11).Mangka to, napassake Tominaa Eli nakua “na Kapenombannamora to Israel ungkamaseangko tu mupalakunna ”(ay.17).Kamasusussanna Indo’ Hana napopembalik Puang mendadi kaparannuan sia kamauparan belanna Nakamasei Puang misa’ pia muane tu nasangai Samuel (ay.20).

Sitonganna tang diupu’ urekenni tu pebalinna sia pa’kamaseNa Puang lan katuoanta keallo-keallo.Ta paressamo kaleta, manassa susisiaki’raka indo’ Hana massambayang?Ta pengkullei siamoraka umbuai tu pangalonan sia pa’dandinta lako oloNa Puang?Nakua Puang Yesu..”Iake umpalakukomi apa lako Kaleku, natete dio sangangKu, la Kupaden”(Yoh.14:14)

Nakua londena Toraya “kenatorroiki’ rampa’ ilan tananan dapo’,
Bo’bo’ sangraku’ dikurrean sumanga’ (londe-londena toraya No.220) Amin.