Senin, 11 Mei 2020 Kisah Para Rasul 7:9-22
TUMANAN LAN KAMALOLOAN
Teguh dalam Kebenaran

Biasa mo’dong penaanta sia umpabu’tu kamapallan yaraka na diannan essun ke denni temai to disanga lamepa’kadanan, sia laumpembuloiki’ apa iapole’omo tu tangmalolo lako kaleta (nasanga toraya metobok leko’). Susimo dadi lako Yusuf to. Sitonganna iari temai siulu’na tu la umpa’kadananni apa iapole’mo tu unggaraganni tangnga’ kadake belanna nartumang kapangimburuan, sae lako nabaluk lako Masir (ay.9).

Susi tonna balukki siulu’na  tu Yusuf inangla napobangke penaanna. Ia kenna la umpalan penaai Yusuf tonna male tu siulu’na lako Mesir la undaka’ kande belanna karorian pannang attu iato, bisabang napabalai’ tu penggauranna siulu’na. Ma’dinbang lanakua Yusuf kumua indemo lakunai membala’. Inang ma’pasiagi-agibangmo tu siulu’na kumua inang lamembala’mo tu Yusuf lako kaleta, iamoto anna mataku’ merreke’. Apa tae’bang bu’tu diong penaanna Yusuf tu tanga’ kadake la membala’ lako siulu’na. Ia tu mendadi pentoeanna Yusuf kumua mui umba susi temai tau umpogau’ apa kadake lako kalena, apa Puang tu la ma’pakalolo sia ma’paolai salu.Tontong napatongan kumua ia tu kamaloloanNa Puang Matua tangtileluk lako to tontong umpogau’ katonganan. Ia tu kapangimburuan misa’ sipa’ tang tanga’  bulituk. Kapangimburuan mebaa lako kasanggangan, umpabu’tu katangmarurusan, sia umpabu’tu katangrapasan lan katuoan. Den tuna’ nakua Sangbanuanna unnalli oto anna ia unnurrung battuananna tangrapa’ untanga’ apanna to senga’ belanna mangimburu. Toreimi tu mangimburu, pogau’i tu kamaloloan susi Puang tontong umpana’ta’ kamaloloan lako kaleta, anta tontong rapa’ ullingkai te katuoan sia passanan tengko lan pantaranakNa Puang.