Senin, 13 Juli 2020 Mikha 1:1-7
TUNTUTAN TUHAN
Ia Tu Natuntunna Puang Matua

Nenne’ ditiro sia dirangi tu tau untuntu’ misa’ kara-kara belanna natiro kumua den tu katangmaloloan lan kara-kara iato. Ia ke iang manassai kumua katonganan tu diula’, manassa ia tu to umpogau’ katangmaloloan lan kara-kara iato la ussa’ding kalena kumua tangmalolomo tu napogau’, na dianga’ kumua ia tu to umpogau’mo kasalan ma’din umpemeloi penggauranna.

Natuntu’ Puang Matua to to Israel belanna umpogau’mo apa tangsipato’ napogau’ susi misa’ bangsa napilei Puang Matua. Ma’gau’ salamo sia umpenombai kapenomban senga’ susinna deata Baal sia Asyera tu napenombai bangsa senga’. Iamoto anna unlendui Nabi pesuanna Puang Matua anna dipokadan tu penggauranna belanna butung tae’ natandai tu kasalan napogau’. Iamoto anna dipamata’tak tu penggauran kasalan tu napogau’. Apa belanna kamakarrasanna anna noka umperangi tu peta’tan dipokadanni, saelako napake Puang Matua tu to Asyur sola to Kasdim ussanggangi tu buntu kapemalaranna Sia mintu' rapang-rapang dipodeata dipa'na la dipoka, sia pamenganna tu dipennoloan lako deata la diballa api, sia mintu' rapang-rapang dipodeatanna la di nisak-nisak.

Tae’ misa’ tau sia tae’ misa’ bangsa tileluk diomai kasengkeanna Puang Matua, tae’ duka misa’ penggauranna tolino kabunian dio pentirona Puang moi umba dikua umbuni sia umpeonganni. Iamoto anna tontong ma’pakilala tu Puang matua unlendui’ ma’rupa a’gan dikua anna den tontong mengkilala. La tontong diparakai tu katuoanta unlendui’ katuoan masero sia tangtore ma’kurre sumanga’ diona mintu’ kamasokananna lako kaleta anta tontong tumengka lan kamarampasan ullingkai te katuoan. Amin