Senin, 18 Mei 2020 Ulangan 5:23-33
MATAKU’ LAKO KAMATANDEANNA PUANG MATUA
Takut Kepada Kemuliaan Tuhan

Biasa dirangi tu singgi’ toraya umpakala’bi kamatandeanna Puang Matua nakua “Puang tu unnisung dao ba’tangna langi’, To tumampa rara’ta tu untorroi una’na batara tua”….Puang dipentionganni sukaran alukna, dipellulundunni sangka’ passalinanna,…dst. Singgi’ iate dinai umpamanassai kumua Puang Matua ia tu unnai inan madao sia mala’bi’, anna tongloi tu mintu’ ma’dandan maritik anna parentai.

Kamala’biranna Puang Matua dipessa’bian lako to Israel dao misa’ buntu ullendui’ gamara sia api ma’lana-lana tu narangi sia Nakita to Israel. Bu’tu kamatakuranna to Israel tonna rangi tu gamara sia tonna tiroi tu api ma’lana-lana, iamoto anna magiang urreke’ti tu buntu belanna mataku’ mate. Napalakumi lako Musa kumua dai’to anna iamo male mennolo sia sipa’kada Puang.

Nakanassai to Israel tumba kapuana tu kamala’biran kale-kalleanNa Puang Matua. Gamaranna Puang Matua tu narangi sia api ma’lana-lana tu natiro, misa’ tanda kale-kalleanna Puang tu tae’ misa’ apa ladipasitenderanni lan te lino. Iamoto anna mangaku lako Musa kumua mintu’ tu nasanganna Puang Matua manassa inang lanaperangi sia lanaturu’. Tanda kale-kalleanNa Puang Matua mendadi kamanassan lako kalena kumua inang tangla dilambi’ tu kakuasanna Puang Matua. Ia tu gamaranna Puang karangian lan kamalillinan sia ia tu arrangNa Puang Matua ma’lana-lana lan kapittukan. Iamote tu sipatu ladikanappai’ kita taunna Puang Matua. Ia tu Puang sipatu ladikataku’ apa tae’ nala susi tu ungkataku’ pa’pakataku’na to lino sangadinna ungkataku’ Puang iamo tu umperangi gamaranNa sia manappa’ lako kadanna Puang, anna den tontong makaritutu umpogau’i lan mintu’ katuoanta.