Senin, 6 Juli 2020 Roma 1:18-23
NATANDAIBANGRI
Sekedar Mengenal

Buda tau disitandan apa tae’ na diissan umba susi a’ganna, umbanai torro, apa napogau’ sia senga’-senga’na. Susinna den pia solata tonna den massikola apa masaimo tae’na den sitammu len,  ditandai tu sanganna apa tae’ na diissan umbamo nani torro, apa nakarang sia senga’-senga’na. Biasa duka den tau ditandai sangsese, kita tu untandai apa tae’ anna tandaiki’, apa den duka tau ditandai sia natandaiki’ apa kita tu butung tanguntandai.

Lan te pa’basanta dinai umpokadai tu torro tolino lan a’gan kamakarrasanna kumua sitonganna natandai tu Puang Matua apa tae’ anna patorromalesoi tu sipatunna dio olona Puang Matua. Tae’ natandai umpakala’bi’ Puang Matua (ay.21.a), sangadinna ia tu kamala’biranNa Puang Matua napamatuna sia nasondaimo rapang-rapang tangmarendeng. Iamote tu umpabu’tu kaseankean-Na Puang. Ia tu naanga’ Puang Matua lako kaleta kumua ia tu Puang tae’ anna simata-mata ditandai, apa ladiissan duka mindara tu Puang, apa tu naanga’ lako kaleta, umba susi pa’poraianna, na umba susi tu ladipogau’ lako kaleNa. Ia tu Puanga sipatu ladinai ma’kurre sumanga’.

Ia tu Puang, Iamo to tumampata, sia umpadadi mintu’ angge maritik, iamo Puang oto’na katonganan sia kamaloloan ondonganna oto’na Kasalamaranta. Dadi ia tu sipatu dipogau’ dio olona iamo tu kamengkaolan sia kamakaritutuan. Da’ anna ditandai bangri kumua den disanga Puang Matua apa tae’ anna dipengkaolai sia tae’ anna dipatorroi inanNa lan katuoanta, sia sitonganna ditandai duka kumua iasiato tu tangnakaelo Puang Matua apa kita tu butung dianggai’ tanguntandai anna diparuku umpogau’i. Dadi ta soroi’mi tu umparuku umpogau’ apa tangnaporai Puang Matua, anta tontong ma’kurre sumanga’.amin.