Senin, 27 Juli 2020 Kejadian 30:37-43
CERDIK
Matangnga’

Matangnga’ battuananna madomi’ untandai temai a’gan dadi sia matarru’ umbukai ke denni temai apa tangmanassa ba’tu bisa dikua kalando pa’tangngaranna.

Yakub misa’ to katandan unnampui pa’tangngaran kalando sia maluangan. Lan pa’basan dipokada  kumua  unnampui buda sapi sia domba belanna kalando pa’tangaranna sia matangnga’ moiraka na butung den ma’pakenanna (ay.4). Puang Yesu unnadai’ anak gurunna lan Matius 10:16; “Pengkilalai, Kusuakomi male susi domba lako to'guruk. Iamoto, dadi la matangnga’komi susi ula', sia la ma'bulo sanglampa, susi bu'ku”. Matumbai anna alai panganderan Puang Yesu kumua anna ampui anak gurunNa tu tanganga’ susito. Susimoraka te tu sipa’ naampui Yakub tu nasanga Puang Yesu?. Iate pangadaranna Puang Yesu napokada lako anak gurunna laumpakilalai kumua ia tu kadisuanna lamale umpatale’ kareba kaparannuan, dipasangtinti domba male lako to'guruk. Ia tu domba ke malei lako to’ guruk manassa tae’mo nala lussu’ sia inangla namangsanni. Dadi parallu naampui anak gurunna tu tangnga’ kalando dikua da’anna ampelloi’ guruk, sipatu la unnampui tangnga’ situang ma’bulo sanglampa. Matangnga’ tu Yakub lako Laban belanna napakena . Ia tu Rahel anakna Laban tu nakamorai Yakub, nasaro Yakub pitung taun susi tu nasipatui Laban, apa ia tonna ganna’mo attunna tangiamo Rahel tu nasorong Laban sangadinna Lea.

Misa’ kala’bianna Yakub tu matangnga’ apa parallu napakalolo Puang. Naadai’mi Puang Matua umba lanakua umpakei tu tangnga’na anna situru’ pa’poraianna Puang. Sipatuki’ tu melada’ matangnga’ umba ladikua umpakei tu tangnga’ta anna ma’gai’ melo lako to senga’ sia situru’ pa’poraianna Puang. Amin