Senin, 3 Agustus 2020 Kejadian 31:22-42
PUANG MERINDING PALA’
Perlindungan Allah

Den Penanianna Passikola minggu ke dipalembai tama basa Toraya nakua “Pemarangai umpake matammu mentiro, pemarangai limammi, lentekmu, dst belanna natiroko Ambe’ daomai Suruga”. Ia te penannian iate ma’pakilala kumua mintu’ tu dipogau’na sia dipana’na lan katuoan tontong napemaranga Puang Matua.

Susidukamo a’gan katuoanna Yakub tonna torro dio banuanna Laban 20 taunna, apa belanna tae’mo nasusi tu mangka nasipatui (tae’mo nasusi tu napokadanna Laban tu napogau’), malemi tu Yakub untampei. Susi dukamo napogau’ Yakub lako Laban to, (napakena) saelako sengke tu Laban anna male unnula’i tu Yakub. Apa belanna tontong narondong Puang Matua tu Yakub  anna ma’kada lako Laban Nakua: Kilalai tonganni, da muma'kada lako Yakub la melona la kadakena (ay.24) Narondong Puang Matua tu Yakub tangia belanna sipatu tu Yakub dikamasei sangadinna belanna pa’kaboro’nari Puang Matua lako kalena kumua da’ anna tontong umpogau’ kasalan. Napapayan Puang Matua tu kamaloloanNa lananai umpasulei tu taunna lako lalan malolo sia katonganan situru’ pa’poraianNa.

Iamoto, latontong dikanassai lan katuoanta kumua tae’ anna ma’pakappa tu Puang Matua lako kaleta. Tontongki’ napatiroan tu lalan katilendokan, nakamasei sia mepa’kadanan susi Yakub na pa’kadanan Puang lako Laban. Lan 1 Kor.10:13 nakua maruru' tu Puang Matua, tae' Napopa'elo'nakomi dipatondonni petoba, sangadinna la pada Napabu'tu petoba tu katilendokan, kumua ammi batta' umpengkanannangi. Manappa’mokomi lako Puang belanna ia tu Puang malolo sia tontongki’ lana taranak. Amin