Senin, 25 Mei 2020 Mazmur 99:6-9
TO MAKARITUTU NAKARITUTUI PUANG
Yang Setia akan di kasihi Tuhan

Mintu’ki’ unnangai’ dikua kenna tontong tu Puang ungkaritutuiki’. Iamoto anna den menomba lako kaleNa.  Apa ia tu nenne’ dadi, kitabangri morai nakaritutui Puang apa tae’ anna den makaritutu lako kaleNa. Nakua pasimbana toraya, morai kumande apa matukkun mengkarang, morai mendio’ apa noka marandang. Salamisa’ tu naposaba’ anna den tangmakaritutu iamo tu tangsa’bara’ ma’ tayan, butung kita la unnato’i tu Puang sia dikua kenna ia tu disanganna dipalaku yabangsiamo lanasoronganki’.

Lan te Pa’pudian 99, maleso dipokada tu kasa’bianna to ma’pudi kumua ia tu Puang pasareongan lan mai sion sia untongloi mintu’ bangsa, battuananna ia tu parentana Puang lan mai inan madatunna undaoanni mintu’ bangsa sia Ia duka umparentai. Ia tu Puang ma’parenta lan kamaseroan belanna inang Puang masero Ia. Iamoto anna ia tu Puang sipatu dipenombai sia dipengkaolai lan kamaseroan, na minda makaritutu lako kalena iamo la tontong napebali Puang.Naala passangkaran to ma’pudi tu Musa sola Harun sia Samuel diona kamakaritutuanna lako Puang Matua, kumua belanna kamakaritutuanna lako Puang anna ia tu petambana narangi sia napebali Puang sia.

Iamote tu mendadi kasa’bianna to ma’pudi lako kaleta kumua ia tu Puang manassa makaritutu lako taunna, apa ia tu kamakaritutuanna Puang iapi anna mane maleso lako kaleta ke tontongdukapi manassa tu kamakaritituanta kumua la tontongki’ matinuru’ untuntunni tu sukaran alukna  situang kapatonganan. Mendadi petamba lako kaleta (ay.9) kumua la tontongki’ tukku menomba lako Puang situang kamaseroan belanna diomai dinai untayan passakke. Iamoto, maikomi ta tontong makaritutu ma’satuan lako Puang.