Senin, 22 Juni 2020 Pa`pudin  86:8-13
ATTU SITURAN TU NAOLAI TO MA’PATONGAN
Waktu yang dialami orang Percaya

Buda attu dipake namane bisa ditandai tongan tu misa’ a’gan. Susi duka bangsia to ke moraiki’  untandai tonganni tu misa’ tau. Nenne’ piki’  siumpu’, sia  torroki’ sola sangapa-apa  attu.

Passambayangna datu Daud tu tabasa ina’, umpa’petiroanni kumua iatu datu Daud, tae’ na umparampo manna issi penaanna langan Puang, Sangadinna umpamanassa kapatonganna kumua inang Puang tu ampunna katuoanna sia belanna Puang-ri na dadi tu mintu’-mintu’na lan katuoanna. Lan pangakuanna,  nakanassai Daud kumua ia tu Puang Iamo Misa-misanna  Puang, Puang ma’kada misa-ma’ pau tang sala-sala (ay.8-10). Iamo to, namoi na pittuk tanga’na sia pembuda dadi tu kamagasan na tingayo apa inang tae’ra naranggang penanna, ma’ondonganna sorong boko’ dio mai olo-Na Puang. Tontong bang makaritutu tu Daud umpakendek pa’pudian sia kurrean sumanga’. Inang na tiromo sia dadimo lan katuoanna lan attu pura lendu’, kumua tang ma’angge tu pa’kamaseNa sia inang sumpu mamase liu kaboro’  tu Puang lako kalena, lako rapunna, sia lako tondokna. Masai allomo natiro sia dadi lan katuoanna Daud tu kamakaritutuan sia pa’kaboro’ tang ma’enngean lu dio mai  Puang.   

Umbamora susi tu kasiumpuran sia kamandappiranta lako Puang? Umbamora susi kama’diorenanna sia kapa’sattuananta lako Puang? Tontong siaki’raka makaritutu lan mintu’ a’gan sisonda situka’ lan katuoan iate? Manassa inang sisonda-situka’ bangpa tu a’gan. Buda pa tu kamagasan, apa sitongan mandu mo buda tu kameloan. Iamo to inang la tontongki’ makaritutu sisola Puang. Susi pi to anta sipatu tontong la umpomana’ kamatotoran sia katilendokan. Maupa’ tu to makaritutu saba la disa’bu’mo to    umpomana’  karongkosan, kamauparan sia kamala’biran. Amin