Senin, 20 Juli 2020 Mazmur 139: 1 -6
CCTV
Tontongki’ Napemanta

CCTV: Closed Circiut Television, Misa’ panggaraga tolino tu dipake ungkareai temai penggauran kadake lanapogau’ tau. Iate apa iate buda dipake diolu inan nanai buda kaparalluan tobuda susinna pabere’, kantoro’  sia senga’-senga’na. Mataku’ tu tau umpogau’ kakadakean ke natandai kumua den te apa iate dipadio misa’ inan belanna mintu’ napogau’na ma’din ditiro sia ditandai.

Ia ke iabangri te panggara tolinobangri dikataku’, umbao susi lako Puang Matua? Ma’pakalila tu to ma’pudi lan te pa’pudian 139 kumua ia tu Puang Matua natandai sia natiro tu mintu’na, tae’ misa’ apa kabunian dio pentirona Puang Matua. Nakua lan ay 2-5,  Mitandai tu torro ke'de'ku; Mitandai tu lalan tangnga'ku, Mipelalan tu kalingkangku ba'tu kamatindoangku, mitandai tu mintu' tengkaku, tae’ misa' tu tongka' dililaku, tu tang Miissan, o Puang, Mitandi tu tingayo boko'ku, sia Miremme'na' limamMi. Ia tu panggaraga to lino inang manassa kumua ma’angge sia buda tangpalambi’na belanna ia tu torro to lino tu unggaragai buda duka tangpalambi’na, apa ia tu Puang Matua tae’ na ma’angge tu kuasanna, sia natarru’ pentirona tu mintu apa dadi lan te lino. Iamoto anna den sipatu mataku’ lako kalena ondonganna lamataku’ki’ umpogau’i  tu mintu’ penggauran tangsipatu. dio olona Puang Matua.

Nenne’ tangmanassa tumai lalan ladiola. Buda duka tomai a’gan dadi nenne’ tangdikapang, naurungan nenne’moki’ mekutana kumua ba’tula natirosiai Puang Matua temai a’gan dadi lako kaleta. Ta patonganni kumua ia tu Puang Matua tae’ nabelai ma’pakappa sangadinna tontongki’ napemaranga. Mintu’ a’gan sia mintu’ inan natiro Puang Matua podo ta tontong mengkaola sia makaritutu lako pa’poraianna. Amin