Senin, 10 Agustus  2020 Mazmur 28:1-5
DAI’TO ANNA PUANG TONTONG MENGKARANG
Biarkan Tuhan bekerja

Den kada nakua “Posara’i tu sara’mu, dai’to anna Puang ungkarangi tu pengkaranganNa”. Tapogau’i tu dikullena dipogau’, anta tontong ussorongi lako Puang tu mintu’ katangpakulleanta belanna mintu’na ma’din napogau’ Puang Matua.

Iate pa’basan unnulelean a’ganna to ma’pudi tu tangrapa’ penaanna belanna a’gan katuoan tu marassan untemme’i. Bu’tu lan tangnga’na kumua mbai naukungmo Puang Matua susi tomai to kadake, iamoto anna metamba lan kapassambayangan umpalaku pa’tunduan (ay.1-2) sia malaku kumua da’na dipasiurakki tomai to tangmekaaluk sia to kadake (ay.3-5). Sumarro tu to ma’pudi malaku lako Puang belanna natangnga’ kumua ia ke ma’pakappai tu Puang Matua manassa tae’mo angga’na tu katuoanna sia susimo to mengkalao rokko lino to mate. Indete nanai maleso kumua inang naanga’ tongan to ma’pudi tu Puang Matua. Nenne’ dukaki’ susi te to ma’pudi lan untingayoi temai ma’rupa-rupa a’gan, ondongpiraka ke yamo temai a’gan mabanda’ urrampoiki’, ditongannimo massambayang apa disanga mbai ma’pakappamo tu Puang Matua belanna tae’ anna ta’pa umpebali tu palakunta. Biasami bu’tu pekutana kumua mbai naukungmo’ Puang susi den misa’ penanian nakua inangla tontongmoraka te katuoangku sisite, tae’ tonganmo torena tu kamaparrisan urrampoi, umbamora lalan lakuola angku kabu’tui kamanamanan, o Puang padulluanna’ lalanmi….

Ta tontongmo metamba lako Puang susi lan Pa’pudian 23:4 nakua “Moi angku olai lombok malillin parrak, tae' duka kukataku' kasanggangan, belanna Mirondongna', tarasulu'Mi sia ta'baMi umpakananna' penaangku. Patonganni tu Puang sia Rannuanni lan mintu’ katuoanmu. amin