Senin, 9 November 2020 Mazmur 78:5-11
MANDA’ UMPETOI BASSENA PUANG MATUA
(Berpegang Teguh Pada Perjanjian Allah)
Holding Fast In God’s Covenant

Den kada Toraya nenne’ dirangi nakua ” Inang senga’ siamia ke to diannan pepasan dio mai nenekna. Battuananna kumua yanna to diannan pepasan tempon diomai, inang senga’ia tu tengka ke’de’na, buangan kadanna, sia penggauranna lan katuoanna lan tondok, iamoto anna kamali’ sia naangga’ tau.

Lan te pa’basanta Pa’pudian 78 , na pasan Asaf lako mintu’ tarukna Yakub kumua anna pokadanni lanto mimi’na tu Sukaran alukNa Puang (ay 5-6), dikua da’ anna kalupai to Israel tu mintu penggauranNa Puang Matua, sangadinna lanakaritutui sia na toe manda’ tu basseNa Puang lako kalena (ay.7). Napepasanan duka Puang kumua da’mi susi nene’ todolomi, matoro sia battuk (ay.8). Tae’ anna toe manda’i tu basseNa Puang sia manoka unturu’ Sukaran alukNa. Yamo napourungto anna lan kapararian nenne’bang ditalo. Lan Pa’tole 6:6-9 inang dipa’pakaintinan mendadi passanan tengko lako tomatua tu la tontong umpa’pangadaranni lako bati’na sia tu sukaran Alukna Puang Matua dikua anna tontong makaritutu sia ma’mana’ lan pangallu’-Na Puang Matua.

Manassa inang sundun tu pakamasean sia pa’kaboro’Na Puang Matua lempan lako kalena apa nenne’ dukabang tu to Israel manuku-nuku. Iamote tu sipatu lamendadi pa’nannunganta kita taunna Puang Matua kumua yanna tae’  ta toe manda’i tu  Sukaran alukNa Puang Matua lan katuanta, inang la susi dukaki’ to Israel nenne’bang ma’nuku-nuku. Tenmito mendadi passanan tengkota tu tontong la umpepasananni lako bati’ta tu sukaran alukNa Puang Matua dikua anna tu’tuan lobo’ sia matona’ lan kapatonganan. “Maupa' tu mintu' to malolo lalanna, sia to unturu' mana'pa sukaran alukna Puang”(Pa’pudian 119:1). Amin