Senin, 7 Desember 200 Mazmur 27:1-6
MISA’ TU KUPALAKU
(Satu Hal yang Kuminta)
One Thing That I Want

Nenne’ dirangi tu ulelean nakua “butung mata’ka’ sia pussa’ tang ‘nukkunmiki’, sia tae’ bang mo disa’ding anna lendu’ tu attu”. Matumbai na susimo to tu a’gan dadi?

Nakua to ma’ Pudi “Misa’ tu mangka kupalaku dio mai Puang”(ay.4). Ia tonna lan kamandasan, (ay.2-3,5a;6a), tannia kamawatangan sia katilendokan tu mandu  naanga’ sangadinna nakua kenna tontong torro lan banuaaNa Puang angge tuona”(ay.4b). Na paralluliu tu katilendokan dio mai mintu’ passabaran kamagasan apa iatu ma’ iringan na palaku iomo tu ma’dinsiapa torro lan banuanNa Puang.Matumbai na susi to? Belanna torro lan banuaNa Puang iamo nanii untiro sia untarima kamaindanan, kasalamaran,sola kamauparan (ay.5b,6b).

Pussakki’ belanna mandu budamo tu na tiro matanta. Marussa’ penaanta  sia tanga’ta, tangsirundunanmo pa’inaanta belanna budamo tu naanga’ tangnga’ sia nakailui penaanta. La moraiki’ la umpa’pasusi  to senga’, apapole’pi ke manokaki’ tang la susi to senga’, sia manokaki’ la na daoanni to senga’. Iamoto anna butung tae’bangmo disa’ding na lendu’ tumai attu saba’ iatu kamawatangannta, tanga’, doi’ sia kapaissanan dio kaleta,  di pakemo massilomba sia massiala unnula’ kamaruasanna lino.      Mendadi pekutana kumua densiaraka gai’na sia inang manduraka diparallui tu apa mukkun ta parri-parri? Nakua kadanNa Puang “Misa’ tu mangka ku palaku dia mai Puang”. Misa’ri tu mandu parallu, iomo tu “ tontong sitammu Puang  sia urangi tu kadanNa” belanna iamoto tu ma’iringanna lan katuoan belanna  inde to nanii tu “kamaindanan, kasalamaran sia kamauparan”. Den londe toraya nakua;

Sala tengkamo to lino/ sanda  pekaiomo dia’pan sede/ sola pa’lono’-lono.
Londe-Londe Toraya, No.1156. Amin