Tumanan

Ke dipelalanni tu kalingkanna Kombongan lan te lino, manassa kumua ia tu Kareba Kaparannuan dipa’peambaran te’ra anna sule lo’bang. Mukkun rorak lako mintu’ tondok sia mukkun duka kerangan tu to umpatongan Puang Yesu. Susinnamo lan Toraya tonna mane sae tu Kareba Kaparannuan taun 1913, tae’bangpa tau Sarani, apa situru’ tiparanta’na attu, mukkun kerangan tu to Sarani, susi dukato tu Kombongan mukkun duka kerangan bilanganna moiraka anna tangka’tu kamaparrisan sia petelle ussuale Kareba Kaparannuan.

Napoparannu sia nakurre sumanga’ Rasulu’ Paulus tu kamatotoran kapatongananna Kombongan dio Tesalonika belanna ia tu kauntarimanna Kareba Kaparannuan tu napa’peissanan Paulus lako kalena tae’ anna tarima susibangri kada to lino sangadinna natarima susi misa’ kada manappa’ sia tangballe. Na belanna nakanappai’ tongan tu katongananna Kareba Kaparannuan naurunganni tontong mengkarang lan kalena tu kuasanNa Puang. Buda parri’ natingoi Paulus tonna mangadai’ dio Tesalonika, susi dukato tu to menturu’mo lako Yesu, sia den duka tu dipatei. Pa’dik iato bu’tu ludiobangsia mai sangtondokna iamotu to Yahudi belanna nasanga to kapere’ tu to untarimamo Kareba Kaparannuan.

Kamaparrisan belanna mengkaola lako Puang inangla tae’ torena urampoiki’ la kale simisa’-misa’ta, la lan Kombongan. Pelo’bo diomai to lino lako Gereja nenne’bang dirangi sia dibasa lanlu telepon, na tangia ludio manna mai to tang Sarani sangadinna ludiomai to Sarani tu tontongpa nakuasai pa’poraian lino. Apa moi anna susito tae’ na den la soyang sumanga’ sia mataku’. La mukkun dipatunannang tu kapatongananta, belanna Kuasa ia Puang unneai tomai to bulituk. Amin.