Da’mi Mapia-pia

Tangmatokko tu to matua (matona’) ke mapia-piai, la diona penggauran, pessiparan sia buangan kada. Yamoto ke den to matua tangmelobang buangan kadanna biasa dikua ma’ulelean pia, ba’tu penggauranna tu tangkan matokko nenne’ di kambaroan kumua susibangko pia’-pia’. Tae’ora na dikua kadakena bang napokada ba’tu napogau’ temai pia, apa dionari sukaran penggauran, buangan kada sia pessiparan belanna ia tu to matua digente’mo to kalando pesuka sia maluangan ba’tang.

Napakilala Rasulu’ Paulus tu kombongan dio Korintus kumua da’ anna mapia-pia lan pa’tangaran sangadinna kakadakean nanai mapia-pia. Battuananna kumua ia ke pia umpogau’ apa kadake, belanna inang tae’pa natandai kumua kadake, apa ia ke tomatona’/to matua, tangmatona’moto ke natandai kumua kadake anna mukkun umpogau’i. Ia tu kapatongananna to matona’ sipatu napake umbangun kapatonganan lan Kombongan, tae’ annala mendadi misa’ apa ladipomadao penaa kumua anna tiroi tau. Apara gai’na tu umpokada pa’kamase ma’rupa-rupa basa ke tae’i anna ditandai apa battuananna lako kaleta. Ten dukamo lako senga’ ke narangai tu disanga pa’kamase ma’rupa-rupa basa anna tae’ natandai battuananna, inangla lanakua ma’kada kumua to bomboan (23).

Ia tu to matona’ lan kapatonganan tae’ anna madomi’ napatiturak sala pangadaran tangtongan, sangadinna tontong bantang lan pangadaran tongan sia umpa’petiroan pa’tuladanan melo, ungkabiri’ kakadakean sia tontong malambu’ lan penggauranna. Silekoranna kumua ia tu mapia-pia lan kapatonganan, iamao a’gan tu maraa napasepanga ma’rupa-rupa pangadaran tang tongan sia tangsipatu dipa’tuladanni. Amin