Umpa’patuduan Parentana Puang

Ia tu didi lan tanan dapo’ totemo butung madarangmo temai tomatua sipa’ulelean anakna. Moi ma’dokko sola anakna tu to matua (Indo’/Ambe’) pada kappabang belanna pada mukkun untemme’ telepon. Tae’bangmora namekutana tu tomatua lako anakna apa tu napogau’, umba susi passikolanna, apapole’ raka la ma’pangada’.Susi duka pia to, yamannapi anna pa’kadai tomatuanna ke denpi kaparalluanna, senga’mito yake denni pangadaran napokadanni to matuanna nenne’ male natananni bokoi’.

Natole napa’pakaintinan Musa lako to Israel tu parentaNa Puang Matua nakua ”Inde sia tu pepasan, inde sia tu apa dipondok sia atoran, tu mangka Napa'parentan PUANG, Kapenombammi, la diadarangkomi, la mituru' lan tondok, tu la minii male lako, la miala mipoapa, kumua ammu kataku'i tu PUANG, Kapenombammu, ke mukaritutui tu mintu' aluk Napondok sia pepasan, tu kupapassanangko, la iko la anakmu sia ampomu lan mintu' allo katuoammu sia anna malambe' tu sunga'mu (1-2). Battuananna mintu’ to lan banua (Indo/Ambe’ sia anak) sipatu tontong makaritutu lako tu pepasan-Na Puang.

Kamakaritutuan lako pepasan-Na Puang iamo lanapolalan kamarampasan lako taun-Na. Iamoto anna sipatu tu to matua mendadi pa’tuladanan kapatonganan lako bati’na, ondongpi diben passanan tengko launnadai’ sia umpatudu anak-anakna lako kauntandaian pepasan-Na Puang lan mintu’ attu, la ia ke unno'ko'i lan banua, la iake dioi lu lalan, sia iake mammai, sia iake millikki, sia lanapemporian dio limanna. Belanna ungkataku’ Puang iamo ma’iringanna pepasan, dadi sipatu la tontong dikaritutui lan mintu’ lingkana katuoan ondongpi la tontong diulelean lako bati’ta. Amin.