Penaa Ma’bulolollong

Lan te a’gan lino totemo buda tau umpokadai kumua madarang sa’pemo tu tau unnampui penaa ma’bulolollong. Budamo ditiro tu tau yanna a’pannimi pa’poraian lino susinnamo Seng/eanan, kao’koran/pangka’, mendadi malammamo tanga’ sia pa’inaanna sae lako malillin dukamo kapatongananna. Den duka tu tau untampe kapatongananna lako Puang Matua belanna mataku’ lako pa’pakarrangna tau, sia den duka tu mataku’ sisayuran baine ba’tu muane belanna nasanga kumua iamo mandu nakamali’, sia budapa uluanna to.

Den tallu tau dipokada lan pa’basan yamotu Sadrakh, Mesakh sia Abednego. Ia te tau sola tallu, tu belanna kama’bulolollonganNa lan kapatonganan anna batta’ unnala kara’tasan kumua tae’ anna lamorai turu’ menomba lako rapang-rapang bulaan, tu napabendan datu Nebukadnezar. Barani unneai tu parentana datu moi raka anna maleso kumua minda tangunturu’ parentana datu manassa ladipatei. Tae’ anna sosso’ kapatongananna belanna manappa’ kumua manassa nangla natundui Puang Matua. lan aya’ 17-18, mebali lako datu nakua ”Iake matoto' siai tu Kapenombangki tu kipenombai la urrampanangkan, manassa la Narampanangkan lan mai dapo' nanii api ma'lana-lana sia lan mai limammi, datu. Apa iake susinna tae' Nabelai la miissan, e datu, kumua tae' kila umpakarayai tu mai deatammi sia umpenombai tu rapang-rapang dipodeata bulaan, tu mangka mipabendan”.

Lan lino to temo buda tu a’gan mea’panni sia nenne’ mepamataku’. Iamoto anna sipatu diampui tu penaan ma’bulolollong lan kapatonganan lako Puang Matua. Kama’bulolollongan lan kapatonganan, iamo la umpabatta’ki’ tumanan massattuan lako Puang Matua. Amin.