Kamala’biran Bassena Puang

Den kada nenne’bang dirangi siumpu’na basse lan katorayan nakua ”Kada disedan sarong domai tongkonan, bisara ditoke’ tambane baka lanmai isungan pa’kalandoan”. Battuananna den pepasan domai tongkonan tu sipatu diangga’ sia dikasiri’ dikua anna tontong tumengka melo tu ada’ sia aluk anna diporapa’ lan pa’rapuan sia lan tondok.

Ia tonna tassu’mo lanmai tondok Mesir tu to Israel, rampomi lako padang pangallaran Sinai. Kendekmi tu Musa rekke buntu Sinai mennolo lako Puang Matua anna ma’kada lako Musa kumua ”Mitiromo tu apa Kupogau' lako to Mesir, umba Kukua urrande pala'komi susi dao pani' langkan maega, angKu pasaekomi lako Kaleku”(4). Kada iate lananai Puang umpamanassai kumua ia tu Pangallu’-Na lako taunna inang tangleluk. Apa Napasitung duka pepasan lako Musa kumua anna pamata’takki napokada lako to Israel kumua ”iammi perangii tonganni tu kadangKu sia mikaritutui tu basseKu manassa dio mai mintu' bangsa kamumo tu dadi mana'Ku, belanna mintu' lipu daenan Aku puangna.Kamumo la dadi misa' kadatuan to minaa sia misa' bangsa dipamarimbangan dio oloKu.”(5,6).

Ia tonna pokadai Musa lako to Israel te pepasanNa Puang Matua, mintui’ mangaku anna ”sangrambanammi mebali nakua: ”Mintu' tu kada Napokada PUANG la kipogau'!” Mata’tak pebalinna umpebali tu kada napokada Musa. Napasan Puang kumua anna seroi kalena tu tau iatomai diomai mintu’ kamaruttakan belanna mala’bi’ tu BasseNa Puang diparampo lako kalena, sia tae’ annala pangakui bangri sangadinna tontong lana toe manda’ ullendui’ kamaseroan lan katuoan. Susi dukamo kita to sipatuki’ tontong tuo masero anna mala’bi’ tu BasseNa Puang dio kaleta. Amin.