Tangdilambi’ Tu Lalan Penaanna Puang

Tantu mintu’ to matua ungkamali’ kumua na ia tu anakna tontong kinaa. Tontong napakilala sia napangadai’ dikua anna tutu lalan lako kameloan, apa pole’ raka ke ia tu to matua misa’ to makaritutu lan kapatonganan. Ia ke randukmi temai bati’na tama kamatonaran, nenne’ napakilala kumua iake lanmi penaanna la mendapo’, melo ke napemaraga meloi tomai to natu’tunni kamamaliranna kumua to sangkapatonganan sia raka. Tontong dianga’ tu pa’pakilala susi to lako temai bati’ta, yaraka ia da’na dikalupai tu umpatu’tu’tunni lako Puang.

Susimo dadi lako Simson, belanna ia tu nanai tu’tun kamamaliranna iamo tu misa’ baine to Filistin. Ia tu to Filistin inang siuali to Israel, senga’mito kumua inang napa’pakilalanmo Puang Matua kumua ia tu to Israel da’ anna siumpu’ to Filistin belanna maraa natumang tu kapatongananna lako Puang Matua. Pussak nasa’ding Manoah sola bainena (to matuanna Simson) belanna ia tu Simson ungkamorai misa’ baine to Filistin. Natanga’ to matuanna kumua umbamo lanakua mendadi nasirinna Puang Matua ke silekorannmi pangallu’Na Puang Matua tu tanan penaanna. Apa moi na susito inang naparuku Simson la umpobainei tu baine nasanga nakamali’ tongan.

Manassa inang tangdilambi’ tu lalan tanga’-Na Puang tu lanapogau’ lako taunna. Ullendui’ kasibaliana Simson sola baine to Filistin nanai maleso kumua iamo lalan lanapake Puang Matua ullendokan taunna lanmai limanna to Filistin belanna attu iato naparenta to Filistin ti to Israel. Tontong nakuasai Penaanan-Na Puang Matua saelko tontong dio kalena Simson tu kamatotoran (ay.6,19). Sipatu totong ladipa’pakilalan lako bati’ta tu pangadaran-Na Puang, yarakaia la tontongki’ manappa’ kumua ia tu lalan tanga’ta tae’ anna susi lalan penaan-Na Puang. Amin.