Manappa’ Lako Pangallu’na Puang

Nenne’ki’ tu tang sa’bara’ untayanni tu pangallu’-Na Puang, saelako madomi’bangmoki’ naa’panni tanga’ sia pa’inaan tolinota dikua kenna madomi’ dikabu’tui tu disanganna. Susimo Yakub sola Ribka indo’na, umpakena Ishak belanna maduang la umpomana’ katonganan anak pa’bunga’, iamoto anna patamai tanga’ siluang tu Ishak kumua anna ia na pasakke. Apa moi anna susito, ia tu kamatandean-Na Puang tangleluk lako pangallu’-Na. Ia tu mangkannamo Naallu’ manassa lana palanda’.

Iamoto anna sipatu diampui tu kamanapparan sia kamengkaolan lako pangallu’-Na Puang kumua anna ia la ussundunni lako kaleta, da’ anna kita kalena la umpamatantui susi tu naanga’na penaanta. Yakub sola Ribka, belanna tangmanappa’ mo lako pangallu’-Na Puang anna urungan ma’tanga’ tangmalolomo saelako umpakena Ishak. Buntu tumangna penggauranna Yakub sola Ribka anna bu’tu tu russa’ lan tananan dapo’. Sengke kapua tu Esau la morai umpatei Yakub belanna penggauranna, iamoto anna suai Ishak tu Yakub male umpallaian kalena lako Padan-Aram, iamotu lako banuanna Betuel, ambe'na indo' ba’tu Nenekna.

Manassa tangdipomelo tu undoloi pangallu’-Na Puang. belanna inangla umpabu’tu katangrapasan. Apa tenmoto tu Puang inang sumpu mamase, anna ia tu Yakub moiraka anna kasalanmo, apa tae’ na sa’bianganni Puang. Ia tu inang nalampakmo Puang lako Yakub randuk tonna tae’pa anna dadi tontong napalanda’ Puang lako kalena. Iamoto sipatu tontong dikanappai’ tu pangallu’-Na da’ anna den maraa naa’panni pa’poraian lino tu maraa umpatiturak tanga’ta sia penaanta ondonganna kapatongananta. Amin.