Belanna Kapatonganan

Tae’ra na sala ke mukkunni didaka’ tu katuoan ladipomanaman. Nakua parumbasan, tangiamoki’ tau ke ya dianga’ tu ladipomapa’di’na, yarakaia parallu dipemaranga temai undaka’ disanganna la mepamanan, belanna madomi’ki’ titurak sala ke tae’i anna melo pelleseanta. Susinnamo tu undaka’ seng sia kao’koran belanna disanga kumua manamanmo katuoanta ke budai seng (eanan) diampui, sia mala’bi’mo katuoanta ke denni kao’koran dio kaleta, pakalan ke sandami rupanna tu lalan mukkun ditanga’ ba’tu ke denni lalan tibukka’ na dikuamo para na den lalan moi raka na ditandai kumua tangmelo tu lalan iato.

Sitonganna tibungka’ lalan lako Musa tu la tuo manaman belanna apapa lana daka’ nala tae’. Torro lan banuanna datu Firaun sia inang diala anakmo diomai anakna Firaun (Katassuran 2:10). Tantu mintu’ apa nakamorai den nasang, la kao’koran, pangka’, tangdipokadami tomai ma’rupa eanan. Apa lan tu ianna to, dipokada kumua belanna kapatonganan anna ia tu Musa napamanassa tu pentoean sia tanan penaanna, iamo tu noka la disanga anak diomai anakna Firaun. Napola’biran Musa tu tuo maparri’ sisola taunna Puang Matua sia untampe tondok Mesir.

Indete nanai maleso kumua tae’ anna kabalui Musa tu katuoan manaman sangadinna mandu napa’buda-budai tu mengkaola lako Puang Matua sia ungkamayai taun-Na. Nakatottongi Musa kumua ia tu umpana’ta’i tu katuoanna iamo tu Puang Matua, iamoto anna tae’ anna morai sosso’ diomai kapatongananna. Iamo mendadi pa’pakilala lanmai te pa’basan lako kita kumua Kapatongan manna lako Puang Matua tu mepamatoto’ untoe katonganan sia umpogau’ kamaloloan. Amin.