Susimoto Tu Pa’poraian-na Puang Matua

Mintu’ tau tantu den bang tu mendadi pa’poraianna ba’tu apa naanga’, nadaka’ ba’tu tu naalanna penaanna. Ten duka tu Puang Matua, den bang ia apa tu mendadi pa’poraianNa lako kita taunNa. Naporai Puang Matua ke tuoki’ mengkaola lako kaleNa situang kalantukan penaa.

Lan sura’na rasulu’ Petrus dipamanassa tongan tu mintu apa tu pa’poraianNa Puang Matua. Nakua Petrus ma’pakainga’ lako mintu to ma’patongan kumua na tuo untoyangan kale dio mai mintu’na kamailuan pa’kalean, tuo umpapayan kameloan lan alla’na to kapere’, untoyangan kale dio mai mintu kakadakean, unnangga’ parenta sia datu sia to maraya belanna Puang Matua. Nakua dukapa Petrus kumua iatu taunNa Puang Matua la tontong torro to makaka lan Puang Matua, tang ka’tu umpogau kameloan, ungkasiri’ mintu tau sia payan lan katuoanna tu pa’kaboro’ ondongpi tontong mataku’ lako Puang Matua. Lan mintu’na pa’pakainga’na Petrus sitonganna diadai tu mintu to ma’patongan kumua iatu la na pa’buda-budai lan katuoanna iamo tu mintu pa’poraianNa Puang Matua tangngia pa’poraian kalena tu nenne tang situru’ tanan penaanNa Puang Matua. La napangke’ sia la napa’kala’bi’ tu Puang lan mintu’ sulapa’na katuoanna.

Mendadi pekutana kapua lako kita tu napatu duka te kada pa’pakainga’na Petrus kumua umba tonganmo susi lingkan katuoan tu tapana’ta’, tontong siaraka pa’poraianNa Puang Matua tu takamali’ sia tapana’ta’? tae’siaraka napa’poraianta bang tu nenne mendolo-dolo? Iake inang taakui kumua taunnaki’ Puang Matua tu dipatorro to makakamo lan Kristus, manassa inang iamo tu pa’poraianNa Puang Matua tu dipana’ta’ lan mintu allo katuoanta. Amin