Tangdilambi’ Tu Panglampakna Puang
Kedaulatan Tuhan tidak terjangkau
Bacaan: Ester 2 :1-18Den kada biasa napokada tau nakua lendu’ maparri’na tu biung pu’pu’ (pa’de duamo tu indo’ sola ambe’), apa pole’ ke tangpaissanpi temai bati’. Battuananna inang senga’ siami ke denpi temai tumatuanta mepanundu’ sia meparakai. Na belanna sukaran tolinota dipake naurungannim ia ke denni tomai tau biung pu’pu’ tempon bitti’ anna melomo katuoanna, maneriki’ mengkilala kumua inang tangdilambi’ mamase-Na tu Puang.
Ester misa’ baine tu mangurapa anna biung pu’pu’mo. Ia tu Ester dipali’ sola to Israel lako tondok Persia tonna mangka ullaoi to Babel tu tondok Yerusalem. Torro solami Mordekai siulu’na ambe’na sia naala anak. Ma’din bang dikua nangla maparri’ tu katuoanna lan attu lassae. Apa indemote dinai ungkanassai kumua ia tu lalanna Puang Matua lako simisa’-misa’ taun-Na tae’ tau ungkapangi. Ia tu Ester diangka’ mendadi datu baine ussonda Wasti belanna ia tu Wasti manoka unturu’ parentana datu Ahasyweros. Mintu’na te dadi lako Ester belanna kakinaanna sia kamengkaolanna lako Puang Matua. Ia tu Ester tae’ anna pamadao penaanna sia tontong unnangga’ to senga’ moiraka anna dadimo misa’ datu. Iamoto anna mandu losong napakaboro’ datu Ahasyweros anna ia tomai anakdara senga’.
Peladaran kapua lako kaleta kumua ia tu lalan katuoanta tae’ anna torro tolino untongananni. Moi anna biung pu’pu’mo tu Ester apa tontong napanundu’ Puang Matua saelako rampo lako kalena tu misa’ angga’ kapua iamo tu mendadi datu. Iamoto da’ anna kita unggorrisanni te katuoanta, dai’to anna Puang untongananni podo anta tontong mengkaola lako kale-Na. Susi duka to ke diomi kaleta temai kao’koran ba’tu misa’ apa keangga’, da’ anna dipomadao penaa sangadinn tontong ladi timang lan kamalamburan sia kamadiongan penaa. Amin.