Gereja Toraja Badan Pekerja Sinode
RehaT · Renungan Harian

Renungan setiap hari dari Gereja Toraja, dalam bahasa Indonesia dan bahasa Toraja.

Tae’ Anna Mentiro Lindo Tu Puang

Tuhan tidak memandang muka

Bacaan: Roma 2 : 1 – 11
Bahasa Toraja · 2 menit baca

Den kada to kinaa nakua da’ anta madomi’bang umpasala tau, ta tiroi dioi kaleta dolo, tae’siaraka anna kita dolo umpogau’i tu kasalan. Mangka mani umpasalaki’ tau anna kita sule natilengkoi’ na den kasirisan. Den parunde nenne’ dipokada nakua kumman dio tampak illongna tau mutiro anna bulisak lan matammu tangmutiro. Buda tau lendu’ manarangna tu umpasala tau anna sitonganna dio kalena mandu buda kasalan. Iamo temai to susito tu nenne’bang ussanga kalena tongan, anna ia tu napogau’na to senga’ tae’bang papatu situru’ timbanganna.

Ma’pakilala Rasulu’ Paulus kumua Puang Matua kalena ia tu la umpapakkanni simisai’ tu mintu’ penggauranna tau la melona raka, la kadakena raka. Puang ia tu oto’na kamalamburan tu mangra’ta’ tangpakayun bimbang. La diissan kumua tae’ misa’ torro to lino tu masero dio oloNa Puang, iamoto anna tae’ duka misa’ tau la untonganan kamaseroanna dio olona Puang. Puang la ussudi sia umpakkanni katuoan sae lakona tu to umpengkaolai, apa kasengkean sia kamagigi’giran ladipapakkananni tu to basisi inaa sia mengkaola lako kakelokan (7,8). Minda-minda tu umpogau’ kameloan lanaparampoi Puang kamala’biran, sia kadipangkeran sia kamarampasan.

Ia tu Puang Matua tae’ anna mentiro lindo sangadinna mintu’ tau pada nasang dio pentiro-Na. Iamoto na tae’ misa’ tau la usanga kalena mandu losong anna to senga’ dio olona Puang. Timbangan to linota tae’ anna susi tombangan-Na Puang. Dadi ia tu sukaran ladipake ussukaranni kaleta sia padanta iamo tu sukaran-Na Puang Matua situru’ pangadaran sukaran aluk-Na. Dai’to anna Puang Matua kalenamora umpapakkani tu mintu’ penggauranta situru’ kamalamburan-Na. Amin.

Bagikan renungan ini Kirim ke grup keluarga, persekutuan, atau jemaat.
Kirim ke WhatsApp